داير ف حواري زماني
رعده حالّه ف كل كياني
داير خايف من إنساني
إنساني اللابد جوّه
مخليني لا حول ولا قوّه
و كأن م الزمان
إتنحىَ زماني
**
ايه اللي واجعني
ايه اللي
وأنا حي قاتلني
ياترىَ جلد الذات
و مُر وحنضل الأزمات
آهو شيْ وشويّات
خلوني
داير ف حواري زماني
**
حاسس نفسي مني بتتبعتر
حزن شاددني وأنا وراه مجرور
في زمن أغبر
حاسس إني قزاز مكسور
ع الأرض متنتر
ح يجرح اللي يلمُه
ويحاول حته حته يضمه
ويلحم ف الزمان زماني
**
و ده فين اللي يقرّب
ويحاول لحديتي يعرّب
مع إن الكلام مفهوم
لكن الكل يا عيني متجرّب
و طافحه من حشاه الهموم
يبقى مين يجرؤ ويقرّب
و ينزع خوفي من إنساني
**
لو إنت ماتعرفشي الخوف
إندلّه ف حشايا و طوف
وريني قلبك لمّا يشوف
ياترى
ح يكون ايه حالُه؟
ح يبقى زي ماهوّه
ولاّ الجنان راح ينطالُه
و أفضل
داير ف حواري زماني
داير خايف من إنساني
**
(تمت)
