PEUGEOT 504 اسم من ذهب
معاك عربيه ايه؟؟
معايا بيجو
من الكلمه دي بس تقدر تعرف ان اللي بيتكلم معاه عربيه بيجو موديل من 71 لحد 83 و تكون 504!!!
انهارده حتكلم عن عربيه مفيش حد في مصر كلها ما يعرفهاش و اللي معاه واحده منها نضيفه بيعتز بيها اوي و ما بيبعهاش
حتكلم عن البيجو ال 504 العربيه الي ركبها الشعب المصري كله بلا استثناء بمختلف طبقاته
مين فينا مكنش والده عنده 504 .
و مين فينا محدش من اصحابه كان معاه 504
و مين فينا ما ركبش تاكسي 504
و مين فينا اتزنق في يوم و سافر مواصلات و ركب من موقف البيجو!!!!
نزل من العربيه دي شكل واحد بس مع بعض الاحتلافات الطفيفه بدون المساس بالجوهر
من 69 لحد 74 تميزت تلك الموديلات بمقابض ابواب بارزه و كلاسيكيه(اكره زرار كما يسمونها)
و بشكبه اماميه معظمها مغطاه بطلاء النيكل كروم كما كانت تتمع الشبكه الاماميه بأسد بيجو النحاسي المميز .
من 75لحد 83 و كانت تلك الفتره من ازهي عصور ال 504 و بدأت في قصه حب طويله مع المصريين و مع افريقيا عموما و تميزت تلك الموديلات بمقابض الابواب المدمجه و اسد بيجو ايضا تم دمجه في كلام من الشبكه الاماميه و طاره الدريكسيون الحديثه المصنوعه من البروبلين بدلا من الطاره القديمه الصلبه
غير ان التابلوه في الموديلات الاولي كان لونه فاتح اما بعد 75 كان لونه اسود .
نور التابلوه كان لونه ابيض (GL) لحد سنه 77 اما سنه 78 كان لونه اخضر و سنه 79 كان لونه احمر و واستمر نور التابلوه الاحمر مع بيجو لحد انهارده
بالنسبه لدواخل العربيه كان لونها في الموديلات قبل 75 لونها بني غامق و الموديلات لحد 78 لونها رصاصي اما ال 79 كانت بنفس لون السياره.
(GL.GR.SR.L)
انها موديلات العريقه 504 و كلمات سر النجاح لاعظم موديلات بيجو
كانت جميعها موتور واحد تقريبا ما عدا ال L كانت بموتور اصغر و غالبا ما تكون تاكسي
(GL):
كان التابلون بتاعها اكثر اناقه في رايي و كانت العدادات علي شكل دواير منفصله و الكراسي الاماميه كان مدمج فيها مسند الراس و كان الشبكه الاماميه فيها خطين نيكل و الابواب عليها فروع نيكل علي القوايم و المقبض الداخلي كان نيكل برضه و فرش الابواب كان جلد لحد موديل 79 كان جلد و صوف مع بعض علي حسب لون الكراسي.
اما ال(L) فكانت افقر موديل فيهم من حيث التابلوه و من غير جرايد علي الجوانب ولا نواكل علي الابواب و اكر الداخليه بلاستيك ردئ.
اما ال(GR) فكانت اعلي شويه من ال L لكن كانت ال GL احلي طبعا من اي حاجه فيهم
بالنسبه للفروقات الميكانيكيه:
كان مواتير (GL.GR.SR)نفس الموتور ال 2000 سي سي بكامه واحده انما ال(L)كانت 1800 علشان كده تلاقي معظمها تاكسيات و اللي بيفرق بقي ان الاتنين جر خلفي لكن (GL.SR) علي كبالن خلفي انما(GR.L)علي ديفرانس زي بتاع ال 131 و ال132 كده بس طبعا علي كبالن احسن علشان ما بتحسش بهزه المطبات بعكس الديفرانس اللي بيخلي العربيه كله تطلع و تنزل علي المطبات مثلا.
ختاما و مهما اتكلمت عن ال 504 مش حيكفيني فيها صفحات المنتدي جميعا
فتلك السياره من بيجو ساهمت في تشكيل تاريخ مصر المعاصر للسيارات و هيا من اعطت سمعه لكل موديلات بيجو من السبعينات الي الآن .
و مازالت تنتج في كينا و نيجريا بافريقيا بنفس الشكل المعتاد و المحبب للجميع
تلك السياره التي كان يقودها فئات عديده دون خجل عندما يراها احدهم و هيا تخدم في مجال التاكسي
و مازلت تكافح بزخم الشباب رغم عمرها الطويل و لم تسطتع سياره الي الان في ان تحتل مكانه ال 504 عند المصريين الي الآن.
تحيه لتلك السياره العظيمه التي من يوم ظهورها في معرض باريس و بالتحديد يوم 12 سبتمبر 1968 الي الآن لنفس التصميم و ما زالت مصدر سعاده و فرح لملاكها
