أوعى تغير يوم عنوانك
أحسن مرة يرضى زمانك
يبعت فرحة قلب عشانك
تسكن ساكن حل مكانك
تلت حروف متبعترين
لو حزين يبقوا ألم
لو سعيد يبقوا أمل
إختارلك واحدة من الإتنين
سيب الهم بعيد ع الشط
قبل ماتنزل بحر تعوم
أصل الهم تقيل الوزن
ياخدك تغرق ومالهش لزوم
خربش قلبك إنت بنفسك
ولو ... بضوافرك
قبل ماصاحب جاحد ييجى
بنابه يعضك
إبنى مش هو اللى من دمى
وشايل إسمى وملامحى
إبنى الحقيقى هو اللى
يسير على نهجى ومبادئى
لحظة سعادة ... طيش
.............. عيش
بس المهم إن إنت تفضل
إنسان ......... شريف
لو زهر الحلم ماوَردش
بعتر حلمك ع الأسفلت
يطرح شخابيط لخابيط
تسيح ف الشمس
ولد ماإتولدش
بنت ماإتشالتش
وحضن ماإتفتحش
يبقى ف قلوبنا إيه ؟ وحش
صدى فى الأصل يعنى
صوت ... مردود
لأ .. ف الأصل صوت
ماإتكتبش إنه يموت
تعاريج وشوش
وأقنعة مليانه زيف
تقدر تفرق ؟؟؟؟؟
يبقى قلبك لساه شفيف
لو الشمس مرة إختفت
شمعة ممكن تكون دليل
بس لو شمعة إنطفت
قولى إيه يبقى البديل؟
لو ماخوفتش تبقى جبان
لإن ده معناه
إن قلبك
إحساسه ميت من زمان
مرة حاولت أبارز الوقت
وقبل ماأرفع سيفى
وامد
كان الوقت سبقنى ورد
راجع دايما حسابك
وإعرف مين صحابك
بلاش ف كل مرة
الغدر يدق بابك
غير إطار كل الصور
جدد ....قزازها
.............. تفتكر
كام سنه رجع الزمن؟
إحجز تذاكر للسفر
غادر ملامحك
حاول إبعد بعيد
برة نفسك
بصمة صوابعك
علمت على قزازى
ياريت حياتك تبقى معنى
مش مجرد تعبير مجازى
حاتقولى خايف
حااقولك إفرد جناح وطير
شرف المحاولة أكبر دليل
إن إنت ف قلبك وهم كبير
حلم رافض إنه يكون
إوعى تقول عليه مجنون
هو أدرى بظروفه
حقه يعيش واقع مضمون
قلبى لسه بكر ف نضارته
مستنى فارس يثبت جدارته
يملك زمام أمرى برجولته
وبمواقفه
أنا حاسة ف الآخرة
الجنة أنا داخلة
علشان دخول نارين
مسألة ماهيش سهلة
