مذكرات ليث الخليلي

انهالت على المسجات فجأة قبل بضع ساعات تهنئني بـقدوم الشهر الفضيل ، اشكال وانواع كثيرة انتم اعلم بها ! فـرمضان عكس كل التوقعات جانا اليوم السبت بدل من الاحد ( المتوقع ) واللي كنا مبرمجين روحنا عليه ..

وكذا الواحد تلخبط برنامجه بالكامل وتخربط كل ماهو حاط في باله يسويه السبت والاحد والسهرة اليوم بعد ، على كل حال . كل شيء بيجي من عند الله زين ، وعسى ان تكرهوا شيئا وهو خير لكم وعسى ان تحبوا شيئا وهو شر لكم .

انا فقط حبيت اكتب علشان ما اترك المدونة بدون ابديت وعلشان بعد اهنئ كل قارئي المدونة بالشهر الفضيل – على الاقل انتو مجاني مو مثل المسجات ( خلصوا الرصيد ) – ويارب يكون شهر جميل ويعطينا الله به الاجر والثواب والخيرات كما هو متوقع ان شاء الله لنا ولكم !

 للاسف لم استطع الكتابة عن المعاملة “السيئة” التي واجهتها مع شركة طيران الاردنية الجديدة وذلك لضيق الوقت ولكن بنصح كل المغتربين وغير المغتربين المسافرين انهم لا يعتروا بالاسعار الرخيصة .. لانها اكلة هوا ، ولو تروح مشي احسنلك وبترتاح اكثر

على كل حال ، ما فيه داعي اكتب عنهم واذكر نفسي بالتعب والكآبة .. ولكن بكتب عن موضوع ثاني وهو العودة الى المدارس مع انو ما عندي اشي في بالي بهالوقت لكن يلا بنكتب شو علينا ؟ّ!

 هاي اخر سنة الي ، وعلى نظام التراكمي في البحرين .. ترا مو مهمة كثير لكن الواحد لازم يشد حيلو علشان يرفع معدلوا فوق ال 95 ويتكرم .. انا 95 وبدعو ربي كل يوم ما انقص ولا عشر احسن لا اخسر التكريم .. وان شاء الله بشد حيلي .. على كل حال ، انا هسى بالوقت الحالي ما عندي خاطر ادرس واعيش قرف صحوة الصبح ونكد المدرسين والمشرفين .. ولكن انا متأكد كلها كم يوم والواحد بيتعود وكمان انو اخر سنة بتكون حلوة مع الصحاب وكذا ..

الله يعيننا يارب خصوصا وانا مريض هسى ( التهاب لوز كالعادة ) وبروح لهم اول اسبوع مسطل وبيوخذ المدرسين عني فكرة غلط كمان الهوش على الدفاتر وهرتش المدارس والكاشير بالمكتبات هذا بيستهلك طاقة والواحد لازم يحسبلو الف حساب ..  اف  !

المهم ، مش عارف شو بدي احكي كمان عن هالسولافة والواحد ما بعرف شو بصير معو ، وعسى ان تكرهو شيئا وهو خير لكم وعسى ان تحبو شيئا وهو شر لكم .. لكن بحب اشكر الزوار على تعاونهم وتجاوبهم معي في مذكراتي .. ومع الف سلامة .